Saturday, November 25, 2006

الحابل بالنابل

هم تلت مواضيع كده على السريع
أولاً : سفير مصر للثقافة وتقريب وجهات النظر العربية المصرية الأمريكية لدى الولايات المتحدة.....منصب عظيم واحد طلعوا على نفسه وقال أنه سعيد بتقديم الدور ده....... يطلع مين....."سعد الصغير" وده طبعاً على هامش فعاليات مؤتمر الرقص الشرقي والغناء الأوبرالي الذي يقيمه النجم السالف ذكره في رحلته الكوكبية التي تنتهي في المريخ لتقريب وجهات نظر أهل الأرض مع " يوفو يوفو يوكافو " في المريخ و - يوفو يوفو يوكافو ..دي للميعرفش ..هي هي العنب العنب العنب بس باللغة اليوفية - وسلملي على الثقافة.م
ثانياً : المفتي الثقافي المصري " الشيخ العلامة فاروق حسني" في آخر كتبه " الهرطقات العنبرية في معرفة الملوخية" أعلن أن الحجاب ردة حضارية وإن كل الشيوخ المنافسين ميطلعوش في زمته بثلاثة مليم.. والنبي دي زمته مطاطه بشكل...
بس انا نفسي أعرف وزير في بلد مسلم بيتكلم ويهرطق طوال سنين واحنا مازلنا سايبينه ليه؟ .. كفايه ياحجه !! أرحمينا ياماما.. ولا أعمل ذي المسرحية وقول " انت ماما وانت بابا .. بس طبعاً مش ذي أنور وجد " م
ثالثا: قصة افتكرتها زمان عن جماعة من الناس كانوا عايشين في هدوء وبعدين كانت بتهجم عليهم الديابه فراحوا جابوا كلاب مستأنسه حولين القرية بتاعتهم تحميهم وفعلا حمتهم بس لما كبرت البلد وكترت الديابة وبقت الناس تتنازل للكلاب دي عن كل حاجة ولو حتى آخر لقمه في البيت عشان تحميهم.... راحت الكلاب اتسعرت لما تأخروا يوم الناس في الأكل أصل الناس فقرت من كتر مسابت كل حاجه للكلاب وبعدين الكلاب بدأت تهاجم الأهالي و البيوت عشان الأكل حتى لو كان للصغار وبعدين اتسلت على الناس نفسهم وبعدين استعبدتهم ولما لقيت أن الديابه ممكن تديهم أكل أو تعرف تلاقيلهم الأكل اللي مخبينهم أهل البلد .. تصوروا توحدت الكلاب بالديابة وبقى كله ديابه وبقت البلد في ادين الديابه أكتر مما كانت علية من غير كلاب..
كل ما افتكر الحكاية دي أفتكر اللي احنا فيه....حد شايف شبه؟؟

5 comments:

No Fear said...

السلام عليكم
ما علينا من 1 و 2
3 دي قصة جامدة جدا

Anonymous said...

طبعا يا نور الكلام ده كويس بس أحب انك تعتني بالكتابة أكتر من كده لأن نص الكلام غير مترابط وبالتالي غير مفهوم..
عمرو

elkamhawi said...

حكاية الديابة حلوة لكن حوار الوزير المسطول ده حلهم كلهم بس ده اتكلم ولو جيتى تدورى فى داخلهم كلهم شوية الحرامية هتلاقيم نفس التفكير

كلبوزة لكن سمباتيك said...

يعني احنا بين طرفي كماشة
كده كده حنتفعص
--
جامدة قوي القصة دي

elgharep said...

حلوتك على تشبيهاتك على الأقل الديابة والكلاب بتاكل عشان تعيش مش بتبلع زى الشفطات
الغريب